نبدأ معاكم من تحت الصفر خالص
لازم تحدد 4 حاجات عشان تعرف تجيب الدعوة
1- نوع الحاجه ال عايز تحضرها ( مؤتمر - معرض - ورك شوب - عرض ايفينت الخ )
2- تخصصها ( بيطري - بشري - سياسي - ديني - هندسي - قانوني الخ الخ )
2- مكانها ( امريكا - كندا - سويسرا - النمسا - الصومال -موزمبيق الخ )
3- معادها ( يناير - فبراير - مارس - ابريل - مايو - الخ )
يعني مثلا عايز تحضر مؤتمر عن حقوق الانسان في امريكا في شهر اغسطس
ازاي تجيب دعوة مؤتمر أو معرض بره مصر من الالف للياء
يبقي كدة انت حددت كل حاجه بالظبط اهو
حددت النوع : مؤتمر
حددت التخصص : حقوق الانسان
حددت المكان : امريكا
حددت المعاد : اغسطس
فهتفتح جوجل وتكتب
Human Rights Conferences In Usa In August
لغايه اللحظه دي مفيش اي صعوبه دي حاجات بدائيه .. نخش ع المهم بقي
انت عملت كل ال قولناه دة ودخلت ع الموقع بتاع المؤتمر ال عايز تحضره
كل موقع مؤتمر له سياسه مختلفه تماما عن اي موقع تاني
في مواقع بتدخلك مباشرة علي صفحه الحجز والدفع عشان تكتب بياناتك وتدفع وتحجز مباشرة
في مواقع لازم تعمل اكونت ب ايميل و باسبورد الاول وبعد ما بتعمل الاكونت بيبدا يدخلك علي تفاصيل المؤتمر وصفحه الحجز
في مواقع تالته بقي ( زي اخر مؤتمر اشتركت فيه ) يقولك دخلي ايميلك .. فدخلتهوله وبعدين يبعتلك ع الميل كود التفعيل وتروح للميل تاخد الكود دة وبعدين ترجع ع الموقع من تاني وتكتب كود التفعيل وبعد ما كود التفعيل يتكتب يقوم يبعتلك ع الميل تاني confirmation ومعاها صفحه الحجز مباشرة
كل مؤتمر وله سياسه تسجيل وطريقه اشتراك مختلفه عن التانيه
انت بقي عشان متتوهش اول لما تدخل تدور علي كلمه registration أو كلمه registration Form
ولما بتسجل بيبقي عندك كذا اوبشن
1- تحضر ك مجرد مستمع فقط
2- تحضر كمشارك بالابحاث ( مقدم بحث علمي هيتنشر ولازم يتوافق عليه الاول)
3- تحضر ك مصمم للبوسترات الدعائيه للمؤتمر اونلاين
وكل فئه وليها سعر مختلف تماما عن الفئه التانيه فأنت بتختار للي يناسبك وحسب السعر المناسب ليك
وكل مؤتمر وله سياسات تسجيل وسياسه الغاء مختلفه عن التانيه لازم تقراها كويس قبل ما تحجز
في مؤتمر عاملها بالوقت .. يعني لو حجزت قبل المعاد الفلاني تاخد خصم 20% مثلا ولو حجزت بعد المعاد الفلاني الفلوس تزيد 20% مثلا
في مؤتمر يقولك احنا عاملين باكيدج حضورك + الفندق بتاعك + ليموزين من المؤتمر ل الفندق ب السعر الفلاني
في مؤتمر يقولك لو لغيت قبل المعاد الفلاني تاخد الفلوس كلها ولو لغيت بعد المعاد الفلاني هيتخصم من عليك cancellation fees ب كذا .. وهكذا وهكذا
أوقات كتير بيبقي التسجيل في المؤتمرات مجاني و خصوصا اول ما يفتحوا باب التسجيل او ما يسمى ب early bird registration بتحصل صدفه بس ممكن
اهم حاجه يكون معاك كريديت كارد صالحه عشان تحجز بيها .. وبعد ما بتسجل بياناتك و بتحجز بيظهرلك اوبشن في الابليكشن يقولك Do You Need Invitation letter ؟ تقوله ايووووة Yes عايز دعوة وهيقوم باعتلك الدعوة الاصليه فيها كل بياناتك وبيانات المؤتمر
وكل ما كان المؤتمر كبير و له صله مباشرة بتخصصك كل ما كان دة مصدر قوة ف السفارات لقبولك
انا خدت فيزا امريكا علي باسبور منقوع بمسحوق برسيل بنفس الطريقه .. اتمني ان الموضوع كدة يكون فادكم .. ربنا معاكم ومعانا
ليست هناك تعليقات:
إرسال تعليق