السفارات ليه بتطلب اتش ار ليتر ؟
عشان دي عامل من عوامل كثير لأثبات ان ليك حياه مستقره في بلدك وليك ارتباطات في بلدك ومش هتسيبها وتخلع مع اول فرصه
اثبات جهه العمل دة بينقسم حسب نوع شغلك
1- لو انت موظف سواء حكومي او خاص
2- لو انت صاحب عمل حر سواء عمل يدوي او عن طريق الانترنت
3- لو انت لسه طالب
.
* طبعا لو انت كل امورك سليمه خلاص مش هتخاف من حاجه ..
يعني لو بتشتغل شغل حقيقي كل ما عليك انك تطلع اتش ار من شغلك يتم اثبات فيه انك بتشتغل في الشركه الفلانيه دي من سنه كذا .. موقعك في الشركه كذا .. بتقبض السلاري بتاعك برقم كذا .. رقمك التأميني كذا .. هتاخد اجازة من يوم كذا ل يوم كذا .. الشغل موافق علي اجازتك وتخلي المدير او السوبرفايزر بتاعك يمضي وتكتب عنوان الشركه وايميلاتهم وتختمها بختم الشركه
دي الحالات الطبيعيه والناس اللي مبتكونش عندها اي مشكله في السفر لأي بلد في اوروبا
امال ال cases اللي مش طبيعيه هي دي ال هتكلم عليها النهاردة
---------------------------------------------------------------------
هتكلم الاول عن الاخطاء القاتله اللي بسببها بتترفض بسبب الاتش ار
1- التقديم بسجل تجاري و بطاقه ضريبيه :
بسبب سهوله عمل سجل تجاري وبطاقه ضريبيه في مصر بدون معاينه ولا حتي يكون عندك اي مقر للشركه دي علي ارض الواقع ( كله بيمشي بالحب في مصر ) فللاسف بقت كل الناس في مصر بتعمل موضوع السجل التجاري دة
بس فيه 3 غلطات لا يغتفروا في التقديم علي الشنجن بسجل تجاري وبطاقه ضريبيه
* اول غلطه تلاقي الواحد من دول مكملش 25 سنه وعامل انه صاحب شركه !
حط نفسك مكان القنصل وفكر بنفس تفكيره عشان تعرف انت بتترفض دائما ليه .. الحكايه دي اتهرست خلاص في السفارات ..
تخيل كدة انت عايز تقنع السفارات ان مصر اللي فيها ازمه اقتصاديه واستلفنا من البنك الدولي ومع ذلك كل الشباب الصغير بكل فئات المجتمع بمجرد ما يعدي 21 سنه بيبقي صاحب شركه وتجاره وبيزنس ما شاء الله .. مصر كلها فجأه بقت اصحاب شركات
اللي في اوائل العشرينات المنطقي انه بيكون موظف بعد كدة بقي بيبقي له بيزنس خاص بيه .. يعني انك تجيب اتش ار ليتر اكثر منطقيه انك تجيب سجل تجاري
---------------------------------------------------------------
طيب نفترض انك لسه شاب صغير لكن ومع ذلك مقتدر ماديا واهلك مستريحين ماديا وعملولك شركه خاصه بيك او عيادة خاصه بيك بالفعل
ساعتها لازم يعدي علي الاقل سنه من السجل التجاري عشان تثبت للسفارات ان فعلا دي شركه حقيقه مش وهميه وبتعمل نشاط حقيقي مش مجرد وهم علي الورق
* ودي تاني غلطه وهي التسرع في التقديم بسجل تجاري وبطاقه ضريبيه عدي عليهم اقل من سنه .. هتقولي ليه ؟؟
برضه حط نفسك مكان القنصل .. واحد مقدم انه صاحب شركه وفاتحها من شهر ولا شهرين ولا تلاته .. وفجأه كدة بدون مقدمات هيسيب الشركه تضرب تقلب وهيسيب الموظفين بتوعه لايصين وهيسيب شركته اللي لسه فاتحها و هووووب عايز يسافر اوروبا يتفسح !
هتاخد رفض رباعي الابعاد عشان مبتحترمش عقليه القنصل الاجنبي اللي بتتعامل معاه
---------------------------------------------------------
طيب نفترض انك يا سيدي شاب مرتاح ماديا وعندك شركه و كمان معدي علي السجل التجاري اكثر من سنه
ساعتها لازم تكون بتشتغل شغل حقيقي وبيطلعلك حساب ضريبي بالفعل اخر كل سنه .. مش مجرد بيتصفر وخلاص .. معني انه بيتصفر حاجه من اتنين من وجه نظر السفارات ... يأما دة سجل تجاري وهمي وشركه وهميه .. يأما انت شخص فشلت في تجارتك وبتخسر ودة معناه انك عايز تعوض خسارتك وتهرب من خسارتك في مصر بأنك تسافر اوروبا وتكسر فيزا هناك
* ودي تالت غلطه وهي عدم وجود ملف ضريبي حقيقي للشركه بأرقام حقيقيه عن نشاط الشركه في اخر سنه
نلخص نقطه السجل التجاري باختصار ؟؟ عايز تقدم ل الشنجن بسجل تجاري تكون من الاخر بتشتغل شغل حقيقي وليك اعمال وتجاره علي ارض الواقع
لكن غير كدة قدم اي ورق تاني غير السجل التجاري لان السجل التجاري في مصر بالذات من اكثر الحاجات اللي بتتسبب في الرفض رقم 8 تحديدا
----------------------------------------------------------
2 - الفري لانسرررررررررر :
الفريلانسرز اللي بيتقدموا للسفارات نوعين :
1- نوع بيشتغل مع شركات كبيرة أو مؤسسات كبيرة زي جوجل - يوتيوب - امازون - الخ الخ .. ودة بيكون وثيق من الفوز لانه ساعتها بيتحوله الفلوس بايداعات منتظمه من المؤسسات دي كل شهر في البنك اكونت بتاعه
كل ما عليه انه لما يطلع كشف الحساب هيبرز التحويلات دي ودي اكبر اثبات انه فريلانسر و النوعيه دي بكل سهوله بياخدوا التأشيرة ودول امثال شادي سرور - علي غزلان - احمد كيميا - محمود الدره - يحي رضوان الخ الخ الخ
.
2- نوع تاني غلبان شويه وهو اللي بيشتغل مع مواقع وسيطه وبيتحوله الفلوس علي مواقع وسيطه وبيتضطر يسحبهم بالبيبال او موني جرام
وبالتالي كأنه بيقبض كاش يعني
في الحاله دي عشان يثبت انه فريلانسر مفيش قدامه غير انه اي فلوس ياخدها من المواقع الوسيطه دي يودعها بأسمه في البنك ايداع نقدي .. ويجيب ايميلات بينه وبين المواقع دي أو بينه وبين السبونسر اللي بيتعامل معاه ( صاحب الشغل اللي هيتشغلها ) علي up work وخلافه يثبت فيه انه فعلا اشتغل بالفعل معاهم وخد منهم عموله اللي هو بيودعها في البنك دي
بس مخبيش عليكم النوع التاني فرصته اقل بكثير من النوع الاول
------------------------------------------------------------
في ناس مشاكلها في الاتش ار هي الرقم التأميني
انهم بيشتغلوا في شركات ومصانع كثير ومش متأمن عليهم .. في الحاله دي يعملوا ايه ؟؟
لو كنت من اصحاب حرفه معينه مثلا..نجار .. سواق .. حداد .. نقاش .. فنى .. الخ الخ
...او صاحب مهنه نقابيه زي محاسب ..محامى.. طبيب بيطرى ... فنى كومبيوتر ... الخ الخ
لو انت من الحالة الاولى ساعتها تقدر تأمن علي نفسك ك ( فرد حرفي حر ) وتدفع اشتراك شهرى لمكتب التامينات التابع له محل اقامتك ببطاقة الرقم القومى..
الاشتراك هيكون تحت مسمى عمال مقاولات ق4...
وللفلاح وعمال الزراعه الحر تحت مسمى عمال زراعه ق7 ...
بسص خلي بالك في الحاله دي مش هتقدر تثبت اوراق اشتراكك بالتامينات الاجتماعيه الا بعد حصولك على شهادة قياس مهارة من مكتب القوى العامله التابع لمحل اقامتك وكارنية صادر من المكتب بمزاولة المهنه
ودة برضه ينطبق علي الفنيين بتوع الكمبيوتر
اما لو كنت من الحاله الثانيه فهتثبت مهنتك بالاشتراك النقابي ( كارنيه النقابه ) لاصحاب المهنه اللي تخصك واللي ليها اشتراك سنوى
انا شخصيا لما اتخرجت من 5 سنين كان متأمن عليا من غير ما اكون بشتغل عشان مهنه نقابيه
ياريت لو حد هياخد البوست ينسبه ليا عشان التعب ال تعبته ف الكتابه دة
مع محاميحو مش هتقدر تغمض عينيك
ليست هناك تعليقات:
إرسال تعليق