ازاي تخلي كشف حسابك قوي جدا وسبب قبولك في اي سفاره علي وجه الارض

ازاي تخلي كشف حسابك قوي جدا وسبب قبولك في اي سفاره علي وجه الارض
---------------------------------------------------------------------------
سيبك بقي من جلسات الخميس والمُحن بتاع البنات دة وتعالي ل جلسات الخميس مع محاميحو عشان هنتكلم ف موضوع مهم جدا النهاردة في السفر وهو ازاي تظبط كشف الحسب بتاعك عشان تاخد اي فيزا في الدنيا
.

في اعتقاد خاطئ عند الناس اني طالما معايا مبلغ ف حسابي ف البنك اني كدة هسافر .. السفارات خصوصا السفارات الكبيرة مبتبصش للموضوع من ناحيه انت معاك فلوس ولا لأ .. لكن بتبص اكثر ل ايه هو نمط الحياه ال انت عايشها في بلدك وطريقه حياتك وهل هتحتاج تكسر الفيزا بتاعتهم وتبلط ف الخط عندهم ولا لأ
.

وعشان تثبت نمط حياتك دي وتبعد كل الشكوك عنك هتعمل ال هقولهولك دة :

1- مبلغ ايداع ثابت ( اللي هو مرتبك ) يتحول علي حسابك في يوم ثابت كل شهر
ولو بتقبض كاش أو انت فريلانسر مثلا .. ساعتها تجمع الفلوس الكاش دي وتروح تحطها بأيدك في البنك في يوم ثابت كل شهر وتكتب في الاتش ار انك بتقبض كاش
.

2- بلاش تسحب مرتبك مرة واحدة فقط في الشهر لأنك كدة بتخلي حسابك راكد ومفيهوش حركه باقي ايام الشهر .. يعني مثلا مرتبك 3000 جنيه .. متروحش يوم 1 مثلا تروح تسحب ال 3000 كلهم! ما انت كدة هتخلي حسابك راكد باقي ايام الشهر لغايه الشهر اللي بعديه

سحب الفلوس يكون علي دفعات اسبوعيا .. وهتخلي تعاملاتك في السحب والصرف بالفيزا كارد .. يعني مثلا هتسحب بالفيزا يوم 1 في الشهر 900 جنيه من مرتبك .. يوم 8 مثلا تسحبلك 900 كمان .. يوم 16 تسحبلك 900 كمان وهكذا ..

تشتري مشترياتك ( سواء اونلاين او من المحلات ) بالفيزا .. تدفع فواتيرك علي النت بالفيزا .. تشحن رصيدك بالفيزا .. وهكذا .. من الاخر تحسسهم انك عايش حياه طبيعيه ومستقره في مصر .. بتقبض فلوس .. وتصرف منها اسبوعيا حسب احتياجك وتشتري حاجتك وتدفع فواتيرك وتصرف من مرتبك .. طيب هيعرفوا ازاي انك بتعمل كل دة وحياتك مستقرة مش عليك ديون مثلا وبتسدد فيها وعايز التأشيرة عشان تهرب ؟ ببساطه الاثباتات هتكون لما تتعامل بالفيزا كارد .. كل التعاملات دي هتبان في كشف حسابك .. التعامل الكاش مش هيثبت حياتك دي! عشان كدة لازم تحول كل حياتك للفيزا علي الاقل لغايه لما تاخد التأشيرة وبعدين يا سيدي اعمل ما بدالك
.

3- هتخلي جزء من مرتبك يفضل في حسابك كل شهر ( كأنك بتحوش ) عشان تتراكم الفلوس في حسابك ويتكون رصيد اجمالي مناسب بعد فتره
طيب افرض مرتبك ضعيف ومش هتعرف تحوش منه .. و حد هيسلفك مبلغ كبير تحطه في حسابك .. ساعتها لازم لازم لازم تحط المبلغ دة قبل فتره كبيرة من تقديمك ع الفيزا متحطهاش قبل ما تقدم ع الفيزا بمدة قصيرة .. بمعني مثلا لو هتقدم علي الفيزا في شهر 7 مثلا .. تقوم انت من شهر 1 تاخد الفلوس الكبيرة دي تحطها في حسابك وترميهم .. ولما تتراكم الايداعات والسحبات الشهريه علي حسابك لمدة 6 شهور هيصبح المبلغ الكبير اللي اتحط في الاول دة مبيشكلش اي مشكله او مصدر شك فيك وتبقي حققت المعادله الصعبه ( مبلغ اجمالي كبير في حسابك وكمان بقي عليه تعاملات كثيييير جدا وحساب منطقي غير قابل للشك )
.

4- متعملش سحب وايداع عمال علي بطال .. يعني بلاش كل يوم تروح تحط فلوس و هوووب تاني يوم تروح تسحبهم تاني وتفضل تعمل كدة طول ايام الشهر وفاكر انك كدة الواد الفشيخ ال بيحرك الحساب بتاعه .. للاسف هتاخد رفض رباعي الابعاد لانها بتبقي مفقوسه اوي انك بتعمل كدة عشان تعمل حركه وهميه علي الحساب بتاعك .. بالعقل وبالمنطق القنصل هيقول انت بتحط الفلوس ليه في البنك لما انت عارف ومتأكد انك هتسحبهم بعد كام يوم .. ما كنت تخليهم معاك في جيبك وتصرفهم بالمره اسهل واسرع .. احترم ذكاء ال قدامك عشان ال قدامك يحترم ذكائك
.

4- بلاش تعمل ايداعات اكثر من اللازم .. الايداعات دي هتتقارن مع مهنتك و وظيفتك .. يعني مثلا متكونش موظف حكومه وبتحط في حسابك كل اسبوع كام الف جنيه .. هتقول وهما مالهم دي فلوسي وانا حر فيها .. لا للاسف انت مش حر انت لازم تثبت مصدر ايداعاتك دي مقارنه مع وظيفتك .. هل انت بقي هتقدر تجيبلهم كل قرش دخل ف حسابك دخل منين ؟؟ اكيد لا يعني .. يبقي مندخلش نفسنا في متاهات .. الايداع المنطقي بيكون اتنين فقط : ايداع اساسي بتاع مرتبك في يوم ثابت في الشهر .. و ايداع اضافي كل شهر لمدة مرة واحدة فقط او مرتين بالكثير في ايام متفرقه من الشهر كأنه عمولات او اوفر تايم او شغل بعد الظهر .. كدة مبلوعه ..

الا في حاله واحدة فقط الايداعات الكثيرة المستمرة تبقي مفيدة ليك .. لو كان ليها مصدر معروف ومش انت ال بتودعها تكون بتتحولك من مؤسسات وجهات تانيه .. زي مثلا واحد مبرمج بيتحوله مبالغ مستمرة من جوجل وابل ومصادر معلومه وهتبان في كشف الحساب .. ساعتها بس تبقي مصدر قوة .. لكن اي حاجه تانيه يبقي لأ
.

5- لو هنفترض انك هتصرف كل يوم في الشنجن 100 يورو مثلا .. وهتقعد هناك اسبوع .. يعني متوقع انك تصرف 700 يورو .. متروحش بقي تقدملهم بكشف حساب فيه 700 يورو فقط !! لأن مفيش بني ادم عاقل في الدنيا هيروح يصرف كل ال حيلته ورصيده في البنك يبقي صفر بعد ما يرجع عشان يتفسح في بلد واحدة فقط !!! مفيش حد بيعمل كدة .. دة كدة دليل انك هتموت علي الفيزا وعايز تعمل اي حاجه عشان تاخدها حتي لو هتشحت بعدها و حسابك البنكي هيبقي صفر بعد ما ترجع

طيب تعمل ايه عشان يبقي الحركه دي منطقيه ؟؟ لو مثلا متوقع انك تصرف 700 يورو ف اسبوع .. يبقي ساعتها قدملهم كشف حساب فيه 1400 يورو يعني الضعف .. بحيث لما السفاره تعمل حسبتها تلاقي انك بعد ما ترجع من عندهم هيتبقي في رصيدك فلوس كثير وبكده هتبقي منطقي انك راجل رايح تتفسح في الشنجن ومش هامك ان فلوسك تنقص من الرحله دي
.

6- لو انت صاحب شركه هتقدم كشف حساب الشركه اللي بتبين حجم تعاملاتها علي مدار الكام سنه ال الشركه اشتغلت فيهم ويكون متناسق مع السجل التجاري .. يعني ميكونش السجل التجاري لسه معمول من كام شهر وكشف حساب الشركه يكون فيه نص مليون مثلا .. للمره التانيه احترم ذكاء القنصل عشان هو كمان يحترم ذكائك ..
وممكن تقدم كشف حسابك الشخصي مع كشف حساب الشركه بس المهم تظبط الاثنين طبقا لكل النقط ال شرحتها دي
.-----------------------------------------------------------
ملحوظات مهمه جدا جدا جدا

1- في ناس مبتعملش كل دة وبتاخد التأشيرات عادي .. ايوة بالفعل في ناس مبتحتاجش تعمل كل دة .. بس لو هنقسمها نسبه وتناسب ف فرصتك بعد ما تعمل كل ال فوق دة هتبقي مثلا 90% مقابل 50% من انك متعملش كل دة وتاخد الفيزا

احنا بنتكلم عن ازاي تخلي موقفك يبقي قوووووي جدا مش مجرد قوي بس
.

2- السفارات السهله زي الهند وتايلاند والحاجات دي مش مهم عندهم كل دة اساسا .. دول بيتاخدوا ببطاقه التموين .. لكن احنا بنتكلم عن السفارات الكبيرة
.

3- مش مهم نوع او اسم البنك او البريد ال هتعمل فيه حساب .. مش مهم الحساب جاري ولا توفير .. كله مقبول في السفارات

ودمتم مسافرين 😍